ABŞ-ın “USS Nitze” hərbi gəmisi ötən gün İstanbula gələrək, Dolmabaxçada lövbər salıb.

Xarici KİV xəbər verir ki, daha sonra İzmit körfəzində lövbər salan 155 metr uzunluğundakı döyüş gəmisinin bir müddət bölgədə olacağı bildirilib.

ABŞ səfiri Cefri Fleyk cümə günü 340 ekipaj üzvü olan gəmini ziyarət edib.

ABŞ döyüş gəmisinin üzərində ənənəvidən fərqli olaraq daha böyük bir kruiz bayrağının istifadə edilməsi diqqət çəkib. Türkiyəli təqaüdçü admiral Cem Gürdeniz sözügedən detalı belə şərh edib:

"Türkiyə terror aktı ilə bağlı xəbərdar ediləcək qədər təhlükəlidirsə, niyə döyüş gəmisi buradadır. Aydındır ki, bayrağın lazım olandan beş dəfə böyük olması mesajdır. O zaman soruşmaq lazımdır: “Bu mesaj nədir və kimədir?”

Qeyd edək ki, Türkiyənin daxili işlər naziri Süleyman Soylu gəmini ziyarət edən Fleykə səslənərək “Pis əllərini Türkiyənin üzərindən çək” sözlərini söyləmişdi.