Yeni Nəşrlər jurnalının redaktoru Yaşar Zeynalovun nəvəsi 2008-ci il təvəllüdlü Tuncay İlkin oğlu Zeynallı həkim səriştəsizliyi və səhlənkarlığının qurbanı olub.. Bəli ürəyində yüzlərlə arzusu olan, özünü gələcəyin həkmi kimi görən Tüncay balamız elə həkimlərin səhlənkarlığı nəticəsində vəfat etdi və bir ailənin ürəyinə od saldı...
Teref.az xəbər cverir ki, Tüncayın babası Yaşar Zeynalov yazır:
08 yanvar 2023 tarixi bizim ailəmin həyatında bir fırtına kimi qopdu. 14 yaşlı nəvəm Tuncay evə gələrkən qarda ayaqları sürüşərək arxası üstə yerə yıxılıb, beli və başı asfalta çırpılır. Yoldaşları onu evə gətirəndə evdəkilər hiss edir ki, Tuncay heç kimi tanımır. Başından aldığı zərbə ilk fəsadlarını göstərməyə başlamışdı. Tuncayın yaddaşının yerinə gəlməyəcəyindən əmin olan oğlum İlkin onu Semaşko xəstəxanasına təcili tibbi yardım şöbəsinə çatdırır. Növbətçi həkimə Tuncayın yıxıldığını və ilkin görünən fəsad kimi yaddaşının itdiyini bildirir. Bu zaman həkim Osmanov Bayram adlı həkim uşağın başının tomoqrafiya olunmasını tövsiyə edir. Tomoqrafiyanın nəticəsinə baxarkən Elşən adlı həkim "keçikçi amneziya"dır (müvəqqəti yaddaş pozuntusu) heç bir təhlükəsi yoxdur deyib xəstəxanada qalmasına ehtiyac görmür. Əslində xəstə yıxılıbsa, görünən xəsarət yoxlanılıbsa, görünməyən və ehtimal olunan xəsarətlər müainə olunmalı idi. Həkimə Tuncayın arxası üstə zərbə ilə yerə çırpıldığını demişiksə, bizim çəkinizi getməsə də, həkim daxili orqanların rentgen və UZİ müayinəsini etməli idi. Etmədi. Niyə, çünki xəstə öz övladı deyildi. Xəsarətin ilkin müayinəsində buraxılan səhv-yəni xəstənin digər orqanlarının müayinə edilməməsi Tuncayda sonradan əmələ gələn ağrıların mənşəyinin təyin edilməsində çətinliklər yaratdı. Əslində bir neçə gün sonra müraciət etdiyimiz Abşeron mərkəzi xəstəxanasının həkimləri "çoban" deyil həkim olsaydılar, Tuncayın UZİ edərdilər və daxildə olan problemləri görərdilər. Ayaqdan başlanan ağrını mənşəyinə varmadan ayaq üçün "karset" və ağrı kəsici mazlar yazan həkimdən nə gözləyəsən?
Artıq yıxılandan 15 gün sonra ağrılar daha da kəskinləşməyə başladı. Bu müddət ərzində həkimlər heç bir köməklik göstərə bilmədilər. Təsəvvür edin müraciət etdiyimiz xəstəxanalar Tuncayın durumunun ağır olduğunu nəzərə alıb, onun bu xəstəxanada yatmalı olduğunu bizə demirlər. Ötür-ötür oyunu ilə sanki bizim əsəblərimizi test edirdilər.
26 yanvar 2023-cü il tarixi mənim ömrümdə Azərbaycanda səhiyyə sisteminə və həkimlərə nifrət etdiyim gün kimi həyatıma həkk olundu. Ağrıları şiddətlənən nəvəmi Əhmədlidə yerləşən Nevroloğiya İnstituna apardıq. Burada Tuncayı MRT müayinəsindən keçirəndən sonra növbətçi həkim "qarın boşluğunda öd, qara ciyər zədələnmələrindən başqa, başında (qulağının arxa hissəsində) sümük zədəsi olduğunu və bu nahiyədə çirk yığıldığını bildirdi. Bizə xəstənin təcili LOR həkiminə göstərilməsi tövsiyə edildi. Ağrıdan maşına güclə oturan Tuncayın Respublika Mərkəzi Kliniki Xəstəxanaya gətirdik. Biz bura çatanda artıq saat 19:30 idi. Təcili yardım şöbəsində və ümumən xəstəxanada bir LOR həkimi tapılmadı ki, Tuncaya baxsın. Təsəvvür edin, biz növbətçi həkimə uşağın durumunun ağır olduğunu, bakıda hansı xəstəxanada LOR həkiminin olduğunu soruşduq. Bizə axşam vaxtı heç bir xəstəxanada növbətçi LOR həkiminin olmadığını bildirdilər və sabah gəlməyimizi dedilər. Həmən gecə Tuncayın şiddətli ağrılarla evdə keçirdiyi son gecə oldu. Ertəsi gün ümüdümüzü göydə Allaha, yerdə həkimlərə bağlayaraq yenidən xəstəxanaya gəldik. Bu zaman Tuncayın gözlərinə sarılıq dolmuş, bədəni saralmış, əllərində lopa qızartılar əmələ gəlmişdi. Axşamdan əlaqə saxladığımız tanış həkim bizə uşağın təcılı əməliyyat olunmasını bildirdi. Bizə əməliyyat öncəsi təcili qan analizlərinin verilməsi, təkrar MRT olunması üçün digər xəstəxanalara nisbətən yaxın olan UNİ Klinikaya getməyimiz, və bütün müayinələrin dövlət hesabına olunacaq deyə tövsiyyə olundu. Bu özəl tibb müəssisəsində də İcbari Tibbi Sığortanın və TƏBİB-in nümayəndəsi otururdu.
TƏBİB-in nümayəndəsi bizdən məlumatları alandan sonra TƏBİB-lə, daha dəqiq desək bu klinikaya Təbibdən kurator olan Rəna adlı xanımla əlaqə saxladı. Bir qədər gözlədikdən sonra mənə məlum oldu ki, bunlar maksimum çalışırlar ki, müayinə, analizlər dövlət tərəfindən ödənilməsin. Məcbur qalıb bütün analizlərin haqqını özümüz ödəməyə hazır olduğumuzu bildirdik. Dərhal qandan analizlər götürüldü. Analizlərin cavabına əsasən bir daha təcili əməlıyyat olunması üçün K.Fərəcova adına Elmi-Tədqiqat Pediatriya İnstitutuna (OMD) göndərildik. Biz ora çatanda Tuncayın durumu çox ağır idi. Xəstəxananın direktoru Allahverdi Musayev xəstənin gecikdirilməsi səbəbindən qarın boşluğunda ciddi fəsadların olduğunu və uşağın əməliyyatı böyük proses olduğundan, Mərkəzi Klinikadan həkimlər dəvət etdiyini bildirdi. Lakin ilkin tıbbı müdaxilədən bir saat sonra Tuncay balamın ürəyi ağrılara dözməyərək dayandı. Mərkəzi Klinikadan gələn türkiyəli həkimlər nə qədər çalışsalar da Tuncayı həyata qaytara bilmədilər.
Bütün bu acıları yaşayan oğlum Ilkinin sonda dediyi söz, məni param parça etdi:
"Tuncay bu zalım dünyadan keçərək canını qurtardı".
Lakin mən bu acını bizə yaşadan başda səhiyyə naziri olmaqla, TƏBİB-in Rəna adlı əməkdaşına, UNİ klinikanın rəhbərliyinə, ilk gündən Tuncayın xəsarətlərin nəzərə almayan, UZİ və Retgen müayinələri etməyən Semaşkonun təcili yardım şöbəsinin səhlənkar həkimlərinə arzu edirəm ki, onlar da bizim yaşadığımız faciəni yaşasınlar ki, başqaları bu faciə ilə üzləşməsin.
Sadəcə sözün bitdiyi yer.....
Ruhu şad olsun!!!